Në shoqërinë shqiptare mbizotëron kultura patriarkale dhe një mendësi e mbyllur e konservatore për të drejtat e grave dhe personave LGBTIQ+. Kjo situatë është edhe më e rënduar në veriun e Shqipërisë, ku mendësia patriarkale është më e fortë, dhuna ndaj grave është e përhapur dhe diskutimi për të drejtat e personave LGBTIQ+ ende duket i largët. Megjithëse përpjekjet e advokimit për të kundërshtuar stereotipet gjinore, për të fuqizuar gratë dhe për të nxitur pranimin e personave LGBTIQ+ në shoqëri janë shtuar dhe kanë fituar më shumë vëmendje në media e në jetën publike, gratë dhe personat LGBTIQ+ vazhdojnë të përjetojnë diskriminim, ngacmim dhe dhunë në punë, në shkollë dhe në mjedise shoqërore. Nisma lindi nga nevoja urgjente që identifikuan së bashku tri organizatat partnere, të cilat kanë një histori të gjatë bashkëpunimi në mbështetje të shoqërisë civile, të drejtave të grave, barazisë gjinore dhe politikave publike që përfshijnë perspektivën gjinore.
Projekti synon të fuqizojë organizatat e shoqërisë civile për të promovuar barazinë gjinore përmes një qasjeje ndërthurëse, e cila merr parasysh format e ndërlidhura të pabarazisë dhe diskriminimit me të cilat përballen gratë dhe personat me identitete të ndryshme gjinore. Kjo qasje synon të nxisë politika më efektive në Shqipëri, që u përgjigjen nevojave të ndryshme gjinore. Qëllimi kryesor afatgjatë i projektit është promovimi dhe mbrojtja e të drejtave të grave dhe personave LGBTIQ+ në Shqipëri.

Fuqizimi i organizatave të shoqërisë civile që veprojnë në fushën e të drejtave të grave dhe personave LGBTIQ+ në Tiranë, Shkodër dhe Lezhë, për të luajtur një rol udhëheqës në advokim, ndërgjegjësim dhe ofrim shërbimesh për barazinë gjinore, si dhe për parandalimin e dhunës me bazë gjinore.

• Organizatat e grave dhe ato LGBTIQ+ forcojnë kapacitetet e tyre për të promovuar dhe integruar agjendat e barazisë gjinore në politikat, shërbimet dhe nismat publike.
• Përmirësimi i politikave gjinore dhe sociale përmes dialogut ndërmjet organizatave të shoqërisë civile dhe autoriteteve vendore në bashkitë e përfshira në projekt.
• Forcimi i kapaciteteve të organizatave të shoqërisë civile që mbrojnë të drejtat e grave dhe personave LGBTIQ+, për të zbatuar nisma pilot, për të ofruar shërbime në mbështetje të këtyre të drejtave dhe për të luftuar dhunën me bazë gjinore.
• Publiku në nivel vendor dhe kombëtar është më i informuar dhe më i ndërgjegjësuar për të drejtat e grave dhe personave LGBTIQ+.