Projekti “BE-ja për të drejtat e pronësisë” (EU4PR) financohet nga Bashkimi Evropian dhe zbatohet nga Zyra e Kombeve të Bashkuara për Shërbimet e Projekteve (UNOPS). Përfituesit kryesorë janë Agjencia Shtetërore e Kadastrës (ASHK) dhe Agjencia për Zhvillim Bujqësor dhe Rural (AZHBR). Projekti mbështet modernizimin e sistemit të të drejtave të pronësisë në Shqipëri përmes përmirësimit të shërbimeve kadastrale, optimizimit të proceseve të punës dhe modernizimit të kadastrës, digjitalizimit të hartave kadastrale, pasurimit dhe përmirësimit të të dhënave, regjistrimit fillestar në zonat kadastrale, mbështetjes për Sistemin e Identifikimit të Parcelave të Tokës (LPIS) dhe forcimit të kapaciteteve institucionale.
Projekti është i organizuar rreth dy rezultateve kryesore. Rezultati i parë, “Sistem i përmirësuar, transparent dhe i digjitalizuar i administrimit të tokës”, përqendrohet në forcimin e kapaciteteve dhe përmirësimin e shërbimeve të Agjencisë Shtetërore të Kadastrës. Rezultati i dytë, “Kapacitete të përmirësuara për Sistemin e Identifikimit të Parcelave të Tokës”, mbështet Agjencinë për Zhvillim Bujqësor dhe Rural në përgatitjen e këtij sistemi. Projekti mbështet drejtpërdrejt përafrimin e Shqipërisë me legjislacionin e BE-së (acquis), veçanërisht reformat e nevojshme për anëtarësim në kuadër të Kapitullit 23 “Gjyqësori dhe të drejtat themelore” dhe Kapitullit 11 “Bujqësia dhe zhvillimi rural”.

• Të rishikojë proceset e punës për shërbimet e ASHK-së dhe të mbështesë shërbimet kryesore përgjatë gjithë zinxhirit të proceseve që lidhen me tokën, për të rritur efikasitetin, njëtrajtshmërinë dhe cilësinë e ofrimit të tyre.
• Të digjitalizojë rreth 39 000 harta kadastrale në letër, që mbulojnë 2 664 zona kadastrale, përmes skanimit, gjeoreferencimit dhe vektorizimit. Kontrolli i cilësisë do të kryhet paralelisht për të siguruar besueshmërinë dhe përdorshmërinë e rezultateve.
• Të përmirësojë cilësinë e të dhënave në zona kadastrale të përzgjedhura dhe të kryejë veprimtari të regjistrimit fillestar në zonat prioritare.
• T’i ofrojë AZHBR-së mbështetje të posaçme për përgatitjen e Sistemit të Identifikimit të Parcelave të Tokës (LPIS), në përputhje me kërkesat e BE-së.

• Më shumë transparencë, akses dhe besim i publikut në administrimin e të drejtave të pronësisë dhe në shërbimet që lidhen me tokën, përmes shërbimeve kadastrale më efikase dhe më të orientuara drejt qytetarit, optimizimit të proceseve të punës së ASHK-së dhe forcimit të kapaciteteve institucionale.
• Harta kadastrale të digjitalizuara sipas gjendjes ekzistuese, që mundësojnë akses në informacionin mbi pronën.
• Cilësi dhe besueshmëri më e lartë e të dhënave kadastrale në zonat e përzgjedhura, përmes veprimtarive të posaçme për përmirësimin e tyre.
• Kapacitete më të forta institucionale të ASHK-së dhe AZHBR-së për menaxhimin e pronës dhe të tokës, në përputhje me standardet evropiane dhe praktikat më të mira.
• Gatishmëri më e lartë për zbatimin e një Sistemi të Identifikimit të Parcelave të Tokës (LPIS) në përputhje me kërkesat e BE-së, duke mbështetur përafrimin e Shqipërisë me kërkesat e BE-së për bujqësinë dhe menaxhimin e tokës.