Проектот „SMS Facility – Поддршка за малите медиуми од Западен Балкан“ им пружа поддршка на независните медиуми ширум Западен Балкан и придонесува за зајакнување на слободата на медиумите, разноликоста и демократијата. Тој ги унапредува вештините на новинарите и медиумските организации и ги поттикнува на соработка преку платформата Journalift, притоа внимавајќи да бидат усогласени заложбите и да се избегне нивно дуплирање.
Локалните медиуми често се соочуваат со ограничени ресурси, политички притисоци и финансиска неизвесност, а овој проект им помага да се справат со овие предизвици. Тој поттикнува иновации, добро управување и јавно-приватни партнерства, со цел да се создаде посилна и поодржлива медиумска средина.
Преку алатката MOVAT, проектот ја следи еволуцијата на медиумскиот сектор и обезбедува поддршка прилагодена на потребите на медиумите. Родовата еднаквост е составен дел од сите активности.
Главни корисници се малите локални медиуми, новинарите (особено новинарките и младите новинари), медиумските мрежи и јавните институции — сите со стремеж за подобро информирани заедници и посилни демократски практики.
Посебна компонента на проектот SMS Facility обезбедува финансирање, обуки и застапување за околу 120 медиуми. Притоа опфатени се два вида грантови: едниот за поддршка на висококвалитетна продукција на содржини, а другиот за унапредување на техничките и организациските капацитети.

Општа цел:
Овој проект има за цел да обезбеди соодветна поддршка за локалните и малите медиуми ширум Западен Балкан, согласно нивната големина, потреби и потенцијал. Со него се има за цел да им се помогне на новинарите и медиумските организации да работат професионално и слободно, поттикнувајќи пристап до информации и разнолик медиумски пејзаж.

Специфични цели:
• Поддршка за најмалку 120 мали и средни медиуми во регионот преку флексибилна помош прилагодена на локалниот контекст.
• Зајакнување на локалните медиуми за да станат поотпорни, преку унапредување на нивните вештини и капацитети.
• Поттикнување на соработка и мрежно поврзување, со цел медиумските професионалци да учат едни од други и меѓусебно да се поддржуваат.
• Промовирање квалитетно новинарство во служба на јавноста, со фокус на инклузија и родова еднаквост.
• Унапредување на долгорочната одржливост на локалните медиуми преку иновации, финансиска поддршка и партнерства прилагодени на нивниот контекст.

• Пуштање во употреба централна онлајн платформа на повеќе јазици, којашто ќе служи како главно место за поддршка и ресурси.
• Шеесет медиуми ќе добијат мали грантови за создавање квалитетна содржина.
• Десет медиуми ќе добијат дополнителна поддршка за надградба на опремата и/или подобрување на начинот на работа.
• Со поддршка од проектот, учесниците на проектот SMS Facility ќе објават повеќе од 600 медиумски содржини.
• Повеќе од 250 новинари ќе ги унапредат своите вештини за попрофесионално и поефикасно известување.