Projekti "Bashkimi Evropian për natyrën" mbështet Shqipërinë në mbrojtjen e biodiversitetit dhe avancimin e përgatitjes së saj për rrjetin "EU Natura 2000", duke përmirësuar menaxhimin e zonave të mbrojtura, veçanërisht, të atyre me rëndësi të lartë për biodiversitetin. Ai forcon kapacitetet e institucioneve përkatëse, promovon zgjidhje të bazuara në natyrë dhe përmes monitorimit të performancës, pjesëmarrjes gjithëpërfshirëse dhe ndërgjegjësimit të synuar mbështet ruajtjen afatgjatë.
Projekti është i strukturuar rreth tetë rezultateve që kontribuojnë në objektivin e përgjithshëm të përmirësimit të efektivitetit të menaxhimit të zonave të mbrojtura. Ai përfshin rishikimin dhe zhvillimin e planeve të menaxhimit për zonat e mbrojtura, si dhe planeve që lidhen me përdorimin e pyjeve dhe produkteve jodrusore të pyllit; vendosjen e sistemeve të monitorimit të performancës; mbështetjen për zbatimin e masave të ruajtjes; asistencën për organizatat e shoqërisë civile, që punojnë me zgjidhje të bazuara në natyrë dhe masa kundër krimit mjedisor; si dhe ndërgjegjësimin për “Natura 2000” dhe ruajtjen e biodiversitetit.

• forcimi i kapaciteteve institucionale për menaxhim efektiv të Zonave të Mbrojtura në përputhje me kuadrin ligjor (acquis-in) të BE-së dhe kërkesat e "Natura 2000";
• përmirësimi i planifikimit, monitorimit dhe efektivitetit të menaxhimit të Zonave të Mbrojtura nëpërmjet planeve të përditësuara dhe sistemeve të performancës;
• mbështetja e masave të ruajtjes dhe të menaxhimit të qëndrueshëm të burimeve në zonat prioritare të biodiversitetit.
• rritja e rolit të shoqërisë civile dhe pjesëmarrjes publike në ruajtjen e biodiversitetit dhe mbrojtjen e mjedisit.

• strukturë institucionale e konsoliduar dhe transpozim i përmirësuar i acquis-it të BE-së për Mbrojtjen e Natyrës;
• kuadër ligjor i rishikuar dhe i përditësuar, përfshirë legjislacionin dytësor, mekanizmat e zbatimit dhe rolin e qartësuar të Fondit Special për Zonat e Mbrojtura;
• plane menaxhimi të përditësuara dhe të reja për zonat e mbrojtura, habitatet dhe speciet prioritare, si dhe burimet pyjore dhe jodrusore të pyllit;
• sisteme operative të monitorimit të performancës të vendosura dhe funksionale në zonat e zgjedhura të mbrojtura;
• aktivitete prioritare të ruajtjes dhe të restaurimit të zbatuara në zonat e zgjedhura të mbrojtura, në bashkëpunim me NAPA-n, autoritetet rajonale dhe qeverisjen vendore;
• organizata të shoqërisë civile që kontribuojnë aktivisht në menaxhimin e Zonave të Mbrojtura nëpërmjet një Programi të Granteve të Vogla që mbështet veprime pilote inovative, zgjidhje të bazuara në natyrë dhe iniciativa kundër krimit mjedisor.