Projekti "BE-ja për një ekonomi qarkulluese dhe rritje të gjelbër: mbështetje për tranzicionin e Shqipërisë drejt një ekonomie qarkulluese" nxit kalimin e Shqipërisë drejt një ekonomie të gjelbër, efektive në burime, të qëndrueshme ndaj ndryshimeve klimatike, si dhe konkurruese.
Projekti zbatohet nga Shoqëria Gjermane për Bashkëpunim Ndërkombëtar (GIZ) në partneritet me Ministrinë e Turizmit dhe Mjedisit (MTM) dhe përmirëson kuadrin rregullator, kapacitetet institucionale dhe kushtet e tregut të nevojshme për tranzicionin drejt ekonomisë qarkulluese.
Projekti fokusohet në harmonizimin e legjislacionit të menaxhimit të mbetjeve me kuadrin ligjor të BE-së(acquis-in e BE-së), vendosjen e sistemeve të Përgjegjësisë së Zgjeruar të Prodhuesit (EPR), përforcimin e kapaciteteve zbatuese dhe promovimin e modeleve të prodhimit dhe konsumit të qëndrueshëm.
Në nivel vendor, projekti mbështet bashkitë në zbatimin e masave të menaxhimit të mbetjeve sipas parimeve të ekonomisë qarkulluese, si qendrat e kompostimit dhe objektet e rikuperimit të materialeve. Paralelisht, nxit inovacionin e gjelbër nëpërmjet skemave të mbështetjes së biznesit, një inkubatori të gjelbër dhe mekanizmave të financimit të vogël që synojnë ndërmarrjet e vogla dhe të mesme, organizatat e shoqërisë civile dhe institucionet kërkimore.
Duke gërshetuar reformën e politikave, forcimin institucional dhe zhvillimin e sektorit privat, projekti kontribuon në mbrojtjen e mjedisit, krijimin e vendeve të punës së gjelbër dhe rritjen ekonomike të qëndrueshme në Shqipëri.

• përmirësimi dhe harmonizimi i kuadrit rregullator për menaxhimin e mbetjeve dhe ekonominë qarkulluese me acquis-in e BE-së;
• forcimi i kapaciteteve institucionale në nivel kombëtar dhe vendor për zbatimin e legjislacionit dhe monitorimin;
• vendosja e skemave të Përgjegjësisë së Zgjeruar të Prodhuesit (EPR) për flukset kryesore të mbetjeve;
• promovimi i efikasitetit në përdorimin e burimeve, eko-disenjove dhe modeleve të prodhimit të qëndrueshëm;
• mbështetja e inovacionit të gjelbër, ndërmarrjeve të vogla dhe të mesme dhe krijimit të vendeve të punës përmes modeleve të biznesit të ekonomisë qarkulluese.

• kuadër rregullator i përmirësuar dhe i harmonizuar me BE-në për menaxhimin e mbetjeve dhe ekonominë qarkulluese;
• kapacitete të konsoliduara të autoriteteve kombëtare dhe vendore për zbatim dhe monitorim efektiv të legjislacionit;
• sisteme funksionale të Përgjegjësisë së Zgjeruar të Prodhuesit (EPR) për kategoritë e zgjedhura të mbetjeve speciale;
• iniciativa të ekonomisë qarkulluese të zbatuara në bashkitë partnere;
• rritje e mëtejshme e modeleve inovative të biznesit të gjelbër që përfshijnë perspektivën gjinore dhe krijimin e vendeve të punës së gjelbër.