Lajme
Zbulo të rejat më të fundit rreth aktiviteteve dhe ngjarjeve që lidhen me BE-në në Ballkanin Perëndimor.
RCC: Hapen nominimet për sipërmarrëset femra të Ballkanit Perëndimor për vitin 2022
Këshilli i Bashkëpunimit Rajonal (RCC) ka kënaqësinë të njoftojë se nisi procesi i nominimit për Sipërmarrëset e Ballkanit Perëndimor të vitit 2022. RCC-ja e nisi këtë iniciativë vitin e kaluar në kuadër të Planit të Veprimit për Tregun e Përbashkët Rajonal 2021-2024 dhe Agjendës së Fuqizimit Ekonomik të Grave për të bërë të njohura gratë që kanë nisur dhe zhvilluar bizneset e tyre dhe kanë kontribuar për punë të reja dhe të qëndrueshme për gra dhe burra të tjerë në rajonin tonë.
Duke qenë se në Ballkanin Perëndimor vetëm më pak se 22% e sipërmarrësve janë femra, është shumë e rëndësishme të promovohen historitë e sipërmarrëseve gra të suksesshme nga rajoni. Fuqizimi ekonomik i grave është thelbësor për të ndërtuar përpjekjet për rekuperimin e qëndrueshëm dhe rritjen domethënëse ekonomike, duke qenë se numri i grave të pranishme në tregun e punës është i lidhur ngushte me zhvillimin e rajonit.
RCC-ja i fton individët, përfaqësues të institucioneve publike dhe private, organizatave dhe këdo tjetër të interesuar për të nominuar sipërmarrëset gra të vitit në një (ose më shumë) nga gjashtë kategoritë e mëposhtme: Gruaja e Gjelbër Sipërmarrëse, Gruaja Kreative Sipërmarrëse, Gruaja Sipërmarrëse e Udhëtimit dhe Mikpritjes; Gruaja Rome Sipërmarrëse; Gruaja Sipërmarrëse e Start-up-it; Gruaja e Re Sipërmarrëse.
Procesi i njohjes do të qëndrojë i hapur deri më 28 shkurt 2023, dhe sipërmarrëset gra të përzgjedhshme duhet t’i kenë regjistruar bizneset e tyre para shkurtit 2022.
