ЕУ и Европската банка за реконструкција и развој (European Bank for Reconstruction and Development – EBRD) финансираат делница на новиот автопат во Северна Македонија; од главниот град Скопје до клучката Блаце, во близина на границата со Косово. Новиот пат ќе овозможи побрзи и полесни врски за трговија и за граѓаните.

Инвестициски грант од ЕУ, во висина од 20,8 милиони евра, како и 8,8 милиони евра финансии за техничка соработка за подготовка, имплементација и супервизија на работата, ќе бидат надополнети со заем од 167,6 милиони евра од Европската банка за реконструкција и развој за изградба на автопатот. Оваа стратешка делница ќе ги подобри врските помеѓу регионот и ЕУ. Истата е дел од транспортната артерија од Скопје до престолнината на Косово, Приштина, која последниве години забележува зголемен сообраќаен волумен и е дел од поголема европска патна мрежа која ги поврзува Шведска и Грција преку Западен Балкан.

Новиот автопат со две коловозни ленти ќе се движи паралелно со постоечкиот магистрален пат А4; едностепен коловоз изграден пред повеќе од 50 години. Ова ќе доведе до значајни подобрувања во сообраќајот и патната безбедност. Исто така, се очекува и позитивно влијание врз вработувањето преку подобрената поврзаност и економска интеграција во регионот.