T’i japësh zë barazisë me dizajnet e modës

Pasi u diplomua nga Universiteti Middlesex në Londër, Teodora filloi të kërkonte mënyra për t’iu bashkuar tregut të modës duke promovuar dhe shitur markën e saj. Ajo e dinte se të pasurit e një marke unike mund të jetë një bekim, por gjithashtu ka sfidat e veta – ishte e vështirë të gjeje një vend në treg përkrah markave dominuese. Ajo ishte vetëm 21 vjeç dhe mundësitë ishin të pakta, por Fundjava e Modës në Shkup, një OJQ nga vendlindja e saj e ftoi që të ekspozonte  punën e saj në Javën e Modës në Riga dhe më pas në Javën e Modës në Lisbon.

“Nuk mund ta besoja që kjo po ndodhte! Sveta nga Fundjava e Modës në Shkup kishte dëgjuar që isha diplomuar dhe se e kisha gati koleksionin e diplomimit. Ajo më telefonoi dhe tha që do të isha një kandidate e mirë për të përfaqësuar Maqedoninë e Veriut në këto shfaqje. U emocionova shumë,” thotë Teodora duke buzëqeshur.

Së bashku me partnerët nga Belgjika, Franca, Letonia dhe Portugalia, Fundjava e Modës në Shkup ka lançuar një projekt të quajtur Moda e Bashkuar, i financuar nga programi  Evropa Krijuese i Bashkimit Evropian. Projekti ndihmon dizajnerët e rinj të promovojnë punën e tyre, të mësojnë aftësi të reja në reklamimin e modës dhe të krijojnë lidhje me kolegë dhe kompani mode në të gjithë Evropën.

Mësimi i bazave

Teodora shprehet se e pa këtë si një mundësi të mirë për të mësuar praktikat e industrisë së modës. “Doja të mësoja si përgatitesh për një shfaqje mode, si bëhen flokët dhe grimi ose si praktikohen modelet.”

Si në Lisbonë edhe në Riga, Teodora mori pjesë edhe në workshop-e dhe seminare me folës të ftuar për të diskutuar mundësitë prodhuese dhe bashkëpunuese, qëndrueshmërinë e markave dhe strategjitë e marketingut. Megjithatë, ajo shprehet se “ishte mundësia e bashkëbisedimit gjatë festave joformale me prodhues të ndryshëm që e ndihmuan  të kuptojë se si funksionon vërtet industria“ që e ndihmuan më së shumti.