Новости
Дознај ги најновите информации за активностите на ЕУ и настаните во Западен Балкан
Објавени добитниците на Европската награда за интеграција на Ромите во Западен Балкан и Турција за 2023 година
На 27. април, Европската комисија ги објави 14-те добитници на петтата Европската награда за интеграција на Ромите во Западен Балкан и Турција. Годинешната награда оддава признание на достигнувањата за промовирање на инклузија на Ромите во рамки на Дигиталната агенда и зелена економија. Церемонијата за доделување на наградите се одржа во склоп на Европската недела на Ромите 2023 (од 24. до 27. април 2023 г.), чиј домаќин беше Европскиот парламент.
Оливер Вархелеј, комесарот за соседство и проширување, изјави: „Честитки на сите добитници за нивната одлична работа! Се надевам дека оваа награда ќе помогне за проширување на нивните значајни активности; за да можат да инспирираат и други чинители кои сакаат да ја подобрат ромската заедница.“
Започната пред 10 години, Европската награда за интеграција на Ромите во Западен Балкан и Турција има за цел да ја потенцира важноста на интеграцијата на Ромите во процесот за проширување на ЕУ, како и да покаже одлучност и посветување за подобрување на општествената инклузија на Ромите во општеството и да овозможи вистински резултати на терен.
Преку оваа награда, ЕУ оддава признание за сите напори и резултати за засилување на Ромите со цел постигнување на нивниот целосен потенцијал како рамноправни членови на сите општества во кои живеат и работат. Фокусот на годинешното издание е инклузија на Ромите во Дигиталната агенда и зелената економија, кои претставуваат нови можности за подобрување на положбата на ранливите жени и мажи Роми, како и на младите Роми во регионот, во иднина. Динамиката на инклузија на Ромите е погодена од општествениот напредок, вклучително и полето на дигитална агенда и зелена економија и мораме да се осигураме дека Ромите нема да бидат изоставени. Затоа, со цел подобрување на условите за живот на Ромите и нивно учество, особено е важно да градиме силни мерки кои одговараат на овие предизвици; преку овозможување прилики за олеснување на пристапот до образование и вработување, здравство и социјални услуги, како и преку мобилизација на заедницата.
Победничките организации на граѓанското општество добија парична награда од 7500 евра за прво место, односно 4500 евра за второ место, а победниците од приватниот и јавниот сектор добија непарични награди. Сите победници добија студиска посета во Брисел, трофеј и сертификат за награда.
Извор: DG NEAR
Извор на фотографии: DG NEAR
