На Самитот ЕУ – Западен Балкан, кој се одржа во Тирана, Албанија, заменик-претседателката на Европската инвестициска банка, Лилјана Павлова, вети поддршка за регионот за справување со итните краткорочни потреби кои се јавуваат поради руската војна во Украина. Оваа поддршка ќе дојде од  „EIB Global“, орган на Европската инвестициска банка фокусиран на операции надвор од ЕУ, во форма на нови проекти за финансирање во регионот, со цел распоредување чиста енергија, проширување на мрежите за електрична енергија и инфраструктура за складирање; како и помош за применување мерки на ефикасност во приватниот сектор. Таа потврди дека Европската инвестициска банка е целосно усогласена со пакетот за енергетска поддршка, во вредност од 1 милијарда евра, најавен од Европската комисија, и планира да игра клучна улога во неговата имплементација.

Покрај поддршка во енергетскиот домен, банката на ЕУ ќе ја зголеми својата сеопфатна палета од позајмувачки, мешовити и советодавни услуги, распоредувајќи повеќе експерти на терен, со цел обезбедување поддршка за поврзување, зелена и дигитална транзиција, образование и здравствена грижа. Еден од приоритетите на банката ќе биде и промоција на раст, дигитализација и декарбонизација на приватниот сектор. Како дел од ова, Европскиот инвестициски фонд, подружница на групацијата „ EIB Group“, го основа Инструментот за развој и иновации на компании во Западен Балкан, Гаранција 4 за отпорност на мали и средни претпријатија, кој има за цел да одговори на економските тешкотии преку зголемување на пристапот за финансирање за околу 4000 мали и средни претпријатија во регионот.