На Самитот ЕУ – Западен Балкан, кој се одржа денес, телекомуникациските оператори од ЕУ и Западен Балкан потпишаа Спогодба за роаминг, овозможувајќи намалување на трошоците за роаминг помеѓу ЕУ и Западен Балкан, со почеток на 1. октомври 2023 година.

Оливер Вархелеј, комесар за соседство и проширување, изјави:

„Ја поздравувам спогодбата потпишана, денес, од страна на телекомуникациските оператори од ЕУ и Западен Балкан, како и нивното посветување за започнување на првите намалувања во октомври 2023.

Дигиталната транзиција за ЕУ и нејзините партнери е на чело на нашата Агенда за поврзување. Достапните телекомуникациски услуги се клучен дел од оваа транзиција. Со намалување на трошоците за роаминг помеѓу ЕУ и регионот, ги доближуваме луѓето и бизнисите. Нашата цел е кога нè посетувате или кога ве посетуваме, сите да се чуваме како дома. Ова е вистинската интеграција на Западен Балкан за која што сите треба да работиме.“

Ова е почеток на процесот кој има за цел постигнување значително намалување на трошоците за роаминг на податоци, со почеток на 1. октомври 2023, кој треба да резултира со понатамошни намалувања на цените и нивно доведување на ниво на домашните цени. Секој телекомуникациски оператор, од Западен Балкан и ЕУ, потписник на спогодбата, ќе земе предвид воведување малопродажни ценовни планови и опции, со пониски цени за своите корисници на роаминг во другите мобилни мрежи со значително намалување на цените, почнувајќи од 1. октомври 2023.

Важно е креаторите на политики во Западен Балкан да ја забрзаат имплементацијата на реформските политики во телекомуникацискиот сектор, кои се во согласност со заклучоците од Дигиталниот самит Западен Балкан 2022; со цел создавање Заеднички регионален пазар за Западен Балкан и погодна деловна средина. Економиите од Западен Балкан треба да ги имплементираат овие реформски политики не подоцна од крајот на 2023 година.

Целта на подвигот за градење успех на режимите „Роаминг како дома“, во ЕУ и Западен Балкан, е поддршка за мобилноста и поедноставување на поврзаноста на граѓаните и бизнисите од ЕУ и Западен Балкан.

Придонесите се многубројни. Намалување на трошоците за роаминг за граѓаните во сите држави од Западен Балкан и ЕУ при патување во регионот и ЕУ, како и пониски деловни оперативни трошоци и охрабрување за водење бизнис надвор од своите граници. Иницијативата е извонредна, особено затоа што се спроведува на доброволна основа помеѓу телекомуникациските оператори.

Оваа спогодба е резултат на силниот ангажман на телекомуникациските оператори од ЕУ и Западен Балкан, како и поддршката од Европската комисија, Советот за регионална соработка и регионалните авторитети; од стапувањето на сила на Договорот за регионален роаминг во Западен Балкан. Останатите телекомуникациски оператори, како од ЕУ, така и од Западен Балкан, се поканети да се придружат на иницијативата.