Шеесет средни училишта од Западен Балкан беа избрани да учествуваат во програмата Супер-училишта на Регионалната канцеларија за младинска соработка (Regional Youth Cooperation Office (RYCO)). Нивните ученици и наставници ќе имаат можност да спроведат меѓу-училишни размени како и да учествуваат во други активности фокусирани на градење на нивните капацитети, вмрежување и соработка.

На првиот отворен повик за Супер-училишта RYCO доби 127 предлози за размена, а над 412 училишта од Западен Балкан ја користеле онлајн платформата www.superschools.net за вмрежување со други училишта. Комисијата за избор потоа одбра 30 најдобри проекти насочени кон поддршка на процесите за градење мир и помирување и меѓукултурно учење и дијалог помеѓу училиштата, учениците и нивните заедници.

Имплементацијата на проектите ќе се одвива од февруари до мај оваа година кога секое училиште ќе организира една посета за размена со својот партнер во траење од шест до десет дена со група од најмногу 20 ученици со еден или двајца наставници. Преку шемата за размена, учениците и наставниците ќе имаат можност да патуваат, да се претстават себеси, училиштето и обичаите на нивните домаќини и да научат нови работи за заедниците во различните делови од нашиот регион.

Програмата ќе се спроведува три години и е дел од мулти донаторскиот проект „Western Balkans School Exchange Scheme” кофинансиран од Европската унија и Сојузното Министерството за економска соработка и развој на Германија (BMZ) и имплементиран од Deutsche Gesellschaft für Internationale Zusammenarbeit (GIZ)заедно со Регионалната канцеларија за младинска соработка (RYCO).